SUARA SALIRA | RELIGI & RENUNGAN – Semoga ada manfaat yang didapat untuk semuanya. Aamin.
Gusti urang sadayana
Kangjeng Nabi anu mulya
Muhammad jenengan nana
Arab Qurais nya bangsa na.
Rama na sayyid Abdulloh
Ibu na Siti Aminah
Dibabarkeun na di Mekkah
Wengi senén taun gajah.
Robi’ul awal bulan na
Tanggal ka duabelas na
April bulan maséhi na
Tanggal ka duapuluh na.
Ari bilangan tahun na
Lima ratus carios na
Tujuh puluh panambah na
Sareng sahiji punjul na.
Siti Aminah misaur
Waktos babar na kacatur
Ningal cahya mani ngempur
Di bumi na hurung mancur.
Babar taya kokotoran
Orok lir kénging nyepitan
Soca lir kénging nyipatan
Sarta harum seu-seu-ngitan.
Medal Nabi akhir zaman
Pirang-pirang ka-anéhan
Sesembahan bangsa syétan
Kabéh pada karuksakan.
Nabi yuswa lima bulan
Geus tiasa angkat-angkatan
Yuswa na salapan bulan
geus capétang sasauran.
Yuswa na sapuluh bulan
Yasa ameung papanahan
Ngéléhkeun budak nu lian
Tapi tara kumagungan.
Parangi na kangjeng nabi
Jatnika pinuh ku puji
Pinter tur gedé kawani
Sabar nya-‘ah ka sasama.
Keur opat tahun yuswana
Diberesihan manah na
Nabi di beulah dada na
Malaikat nu meulah na.
Jibril kadua réncang na
Mikail jenengan nana
Ngeusikeun kana manah na
Ilmu Hikmah sapinuh na.
Tuluy Dada kangjeng nabi
Gancang di rapetkeun deui
Sarta teu ngaraos nyeuri
Di-cap ku hotamin nabi.
Harita Nabi ayana
Di lembur indung inang na
Halimah jeuneungan nana
Sa’-diyah ngaran lembur na.
Rama nabi kacaturkeun
Pupus na ka carioskeun
Basa Nabi di babarkeun
Dua sasih ka-ungelkeun.
Keur lima tahun yuswa na
Ditinggal pupus ibu na
Tuluy dirawat éyang na
Abdul Mutolib asma na.
Kersana Robbul ‘alamin
Kangjeng nabi nu prihatin
Yuswa dalapan tahun yakin
éyang na mulih ka batin.
